حوار محمد غانم

لقاء مع نجمة من نجوم “اراب جوت تالنت” ياسمين العلواني صاحبة الصوت النقي وبداية سألناها البعض يعرف ياسمين العلواني او الاسم الفني ياسمينة اَلي من برنامج المسابقات “أراب جوت تالنت” التي كانت البداية لأنطلاقتك وشهرتك في العالم العربي لكن البعض لايعرف بداياتك الفنية حدثينا عنها ؟
انا بداياتي كنت بحب الغناء من وانا طفله صغيره حتى بيقولولى فى البيت انى كنت بغنى قبل ما اتعلم الكلام لكنى ابتديت أغنى بجد وانا عندى احدى عشر سنه تقريبا. وبابا لما لقانى مصره ودانى قصر ثقافة في الإسماعيلية فرقة الدكتور محمود شلبى ومع انى كنت تحت السن اللى هوه المفروض 18 سنه الا ان اعجابه بيه خلانى اغنى فى الحفلات كلها تقريبا واتشهرت جدا فى الإسماعيلية وبعد حوالى 8 شهور قريت ان المايسترو سليم سحاب طالب أصوات لكورال اطفال الاوبرا ورحت ولما سمعنى اعجابه بيه خلاه يخلينى اختم حفلات كورال الاطفال وفى اقل من شهر غنيت على المسرح الكبير مع الفرقه القوميه للموسيقى العربيه تحت قيادته وغنيت معاه حفلات فى اوبرا مصر واوبرا دمنهور واوبرا اسكندريه وكنت محظوظة بالعمل مع المايسترو سليم سحاب. إلى ان جاء البرنامج وحصل إللى حصل.
من كان الداعم الحقيقي وكان سببا في تنمية هذه الموهبة؟
الداعم الأكبر لى فى كل المراحل هو ابى اللى تعب معايا سنوات طويله من السفر للبروفات والحفلات ودا كان مرهق جدا ومكلف جدا والداعمين كانوا كتير الحقيقه أولهم الدكتور محمود شلبى والمايسترو اشرف عوض الله والاستاذ احمد القاضى فى بدايتى فى الاسماعيليه ثم فى القاهرة المايسترو سليم سحاب اللى بجد ادانى فرص كبيره وخلانى اغنى على أكبر المسارح بجوار أكبر النجوم ثم فترة البرنامج ودعم نجوى كرم اللا محدود هيه ولجنة التحكيم ثم الاستاذ الكبير حلمي بكر والفنان الكبير هانى شاكر وكل الاعلاميين والصحفيين اللى قدمونى للناس بشكل جيد ثم المساند الأكبر لى بعد ربنا سبحانه وتعالى هو الجمهور المصرى والعربى اللى رحب بيه فى كل مكان فى العالم العربى
c69028c5-0920-4045-9829-94de77d34bbb
ما رأيك في برامج تنمية المواهب؟
ياسمينة الي . برامج المواهب بتبقى تجربة صعبة على كل اللى بيظهروا فيها بس فى النهايه بتقدمك لقطاع عريض من المشاهدين فى كل العالم العربي وبعد كدا ربنا معاك انت بقى تكمل مشوارك بتعبك ومجهودك وتوفيق ربنا ودعم محبيك وجمهورك

حدثينا عن ألبومك الجديد؟
ياسمينة الي: الحمد لله ردود الأفعال على الالبوم كانت ايجابية بشكل ملفت واستقبال الجمهور كان رائع والمشاهدات تخطت 2 مليون بعد ثلاث ايام من نزول الالبوم والتعليقات على اليوتيوب والفيس وانستجرام وتويتر كانت حاجه تفرح وبتبعتلى رساله انى على الطريق السليم وانى قدرت اقدم حاجه محترمه تجمع بين الأصالة والحداثة الالبوم اسمه “قصة بنت” وكل بنت فى مرحله معينه بتتمنى تحب ولما بتحب بتعيش الحب بحلاوته ومرارته
هل تنوين تصوير أحد أغاني الألبوم على طريقة الفيديو كليب؟
ياسمينة الي: انا بالفعل صورت غنوة “ايه اللى فيها مش فيه” كفيديو كليب واخرجه المخرج الشاب عمرو ذكريا و الفيديو والاغنيه نالوا اعجاب الجمهور وحققوا مليون مشاهدة فى اسبوع والحمد لله
من الفنانة أو الفنان الذي ترغبين في أن تقدمي عملا فنيا معه؟
ياسمينة الي: الحمد لله انا غنيت ديو مع الفنان هانى شاكر وغنيت معاه عدة حفلات كبرى وكمان غنيت ديو مع الفنان تامر حسنى فى احدى حفلاته وشاركت فنانين كبار فى حفلات كبرى واتمنى أغني ديو مع الهضبه عمرو دياب والفنانين تامر عاشور وحماقى وطبعا حبيبة قلبى شرين ونجوى كرم وبحلم بديو مع الفنان محمد عبده وصابر الرباعى.
هل ياسمين العلواني محظوظة أم أن الموهبة هي من فرضت وجودك الفني؟
ياسمينة الي: مفيش شك ان كل صاحب موهبة محتاج ظروف ملائمه لظهور موهبته وتنميتها وانا بحمد ربنا انه وفقنى للناس اللى هيءُ لي هذه الظروف وبحمده أن منحنى القبول عند الناس وتوفيق ربنا مهم لكل انسان ايا كانت موهبته
هل تستمعين لغيرك من المطربين وبمن تتاثرين؟
ياسمينة الي: مطربينى المفضلين كتير لان فى الحقيقة كل حد بتسمعه بتستفيد منه حاجات معينه بس بجد انا بعشق الفنانة شرين وبسمع لاصاله والمرحومة ذكرى وبسمع انغام ونجوى كرم السيدة فيروز وطبعا الراحله ام كلثوم وفايزة احمد ووردة وشادية وبحب اسمع الاستاذ هانى شاكر وعمرو دياب وتامر عاشور وحماقى و بحب جدا حكيم وبهاء سلطان وعموما انا بسمع اى غنوه تيجى فى طريقى
هل تفكري في خوض تجربة التمثيل؟ وهل تم عرض الأمر عليكي من قبل؟
ياسمينة الي: بالنسبة للتمثيل انا اتعرض عليه كتير بس انا فضلت استنى شويه لانى مكنتش عايزه التمثيل يسبق الغناء يعنى عايزه اكون الاول مطربه وبعد كدا امثل مش ابقى ممثلة بتغنى ودلوقت انا لو جالى دور مناسب فى عمل كبير مع ممثلين كبار اكيد مش همانع
ماهوى جديد ياسمين بماذا تعد الجمهور؟
ياسمينة الي: الفتره الجايه باذن الله بجهز 3 اغانى سينجل هاتنزل تباعا خلال هذا العام واتمنى ان ربنا يوفقنى واكون عند حسن ظن جمهوري بيه وانا طموحي لحقيقي انى اقدم اغانى تعيش بين الناس وتمس وجدانهم وتؤثر فيهم.

a0c6207b-1311-40f8-b047-0da99ae30fc4
خاص ميوز ارابيا